Isertitat agguarnerisa erseqqissarneqarneranut periaaseq
Isertitat
agguarneri pillugit suleriaaseq The European Union Statistics on Income
and Living Conditions (EU-SILC) malillugu suliarineqarpoq, suleriaaseq
pineqartoq EU-mi kisitsisitigut assigiinngitsunit suleqatigiinnikkut
paasissutissiaavoq inuit atugaanut tunngasunik imaqarluni, taakkununnga
ilaapput isertitanut tunngasut. Kisitsisitigut paasissutissiornerni ataatsimut
malitassat assigiinngitsut isertitanut tunngasut EU-SILC-imi
suliarineqarput, taakkunani pingaarnerpaaq Kalaallit Nunaanni isertitat
agguarnerisa suliarineqarnerannut atorneqarpoq. EU-SILC-imi
malittarisassat atorlugit naatsorsuisoqarpoq, malittarisassat tamarmik immikkut
nassuiaasiorneqarsimapput, ilaatigut piumasaqaatit ajoqutaasullu immikkut
allaaserineqarsimallutik.
Periaaseq EU-SLIC EU-standard-iuvoq taassumallu OECD-mi piumasaqaatit angusimavai, tassa
periaatsit atorneqartut nuna tamalaat piumasaqaataat malippai. Taamaakkaluartoq
nunanut allanut sanilliussineq mianersortumik pisariaavoq. Inunnut
ataasiakkaanut pisortat atuinerat assigiinnginnerat pissutaalluni – nunat
marluk isertitaasa agguarnerinik sanilliussineq imaanngilaq atuisinnaanermik
eqqortumik takutitsisoq. Kalaallit Nunaanni pisortat inunnut ataasiakkaanut
atuinerat qaffasippoq, taamaattumik nunanut avannarlernut sanilliussinissaq
tulluarneruvoq. Erseqqissaassutigineqassaaq nunani marlunni pisortat inunnut ataasiakkaanut
atuinerat assigiipajaaraluarpataluunniit eqimattakkaat isertitaasa
assigiinngitsorujussuusinnaanerat.
Nunani
tamalaani sanilliussinermut ajoqutaasoq alla tassaavoq, isertitanut najoqqutat
assigiinnginnerat. Kalaallit Nunaanni isertitanut najoqqutat akileraartarnermut
pisortaqarfinneersuusarput – ataasiakkaat eqqaasanngikkaani – isertitat pineqartut
akileraartarnermut tunngassuteqarput. Isertitat akileraaruteqanngitsut,
pisortat avaqqullugit namminersuutigalugit sulisut pinerluttuliornermilu
isertitat, isertitanut naatsorsuutinut ilanngunneqarneq ajorput. Nammineq
pilersornikkut isertitat (ass. puisit aalisakkat
il.il. nammineerluni pisat) akileraarutaasussaanngillat, tamanna
pingaaruteqarpoq nunanut allanut sanilliussinermut sunniuteqarluni. EU-SLIC-imi nammineq pilersornikkut isertitat
ilanngunneqarneq ajoraluartut Kalaallit Nunaanni piniarluni aalisarlunilu pisat
atuisinnaanermut inuit ilaannut sunniuteqarluarsimanissaat ilimagineqarpoq,
taamaasillunilu isertitat agguarnerat eqqortumik ersersinneqarani. Nammineq
pilersornerup sunniutai isertitakinnerusuni annertuneruppata isertitat nikingassutaat
aamma piitsuussuseq annertuallaarsimassapput
piviusumik tunngaviit eqqarsaatigalugit. Nammineq pisat qanoq annertutiginerat
iluamik misissorneqarnikuunngimmat tamatuma qanoq annertutigisumik
sunniuteqarnera nalileruminaappoq.
1) Assersuutigalugu Peqqinnissamut Isumaginnittoqarfinni
Ilinniartitaanermullu Isumaginnittoqarfinni.
2) Nalunaarsuutit isumaginninnermut
tunniuttakkat akileraaruteqaataasussaanngitsut
kommunineersuupput.